قرارات رئاسية جديدة في الطريق.. السيسي مش هيرحم حيتان الأزمات

قرارات رئاسية جديدة في الطريق.. السيسي مش هيرحم حيتان الأزمات

 
هو ليه كل القرارات الحاسمة بياخدها الرئيس ولازم يطلع بيها توجيهات أومال فين الحكومة وبقية الأجهزة وليه الرئيس هو اللي بيحسم الأمور الصعبة وإيه القرارات الجديدة الرئاسية المنتظرة في الملفات الاقتصادية.. تعالوا نشوف إيه الحكاية

في مصر اتعودنا إن لما تحصل حاجة كبيرة أو أزمات الرئيس هو اللي بيتدخل ويخلصها ودي ثقافة أصيلة عند المجتمع المصري وهي ثقافة الكبير والمسئول والسند وإن البلد لازم يكون ليها كبير سواء على مستوى القرية أو المدينة الكبيرة وصولا لدولة بحجم مصر وعشان كده المصريين بينظروا الرئيس السيسي عند أي أزمة كبيرة لأنهم واثقين هيكون عنده الجل والقول الفصل وهيكون عنده فكر مختلف لا الحكومة فكرت فيه ولا الهيئات المختصة وأغلب القرارات والسياسات اللي حولت مصر من شبه دولة لدولة عافية في كل المجالات كانت بقرارات ورؤيا رئاسية.
أخر الازمات اللي اتدخل الرئيس السيسي لحلها هي أزمة الدولار وارتفاع الأسعار وخد قرارات مهمة وأصدر تعليمات رجعت الثقة للمواطن في البلد وفي نفس الوقت مسابتش اللي تربح وكسب من قوت الشعب وكانت التوجيهات بالحملات الأمنية لتجار العملة والسلع والمحتكرين والرئيس قال مفيش مسئول فوق الحساب وفعلا تم ضبط رؤس كبيرة ومسئولين كبار في عدد من الوزارات والشركات اللي اتورطت في أزمة الأسواق ومفيش حد فوق القانون بدليل مستشار وزير التموين اللي اتجاب من مكتبه اللي جمب مكتب الوزير مباشرة وتمت محاكمته ومعاه بقية التشكيل بسبب تورطهم في التلاعب في الأسعار والسلع.
وغير قرارات رئاسية كتير في الملف الاقتصادي ومنها اقرار حزم كتيرة للحماية الاجتماعية وأخرها رفع الحد الادني للأجور ل6 الاف جنيه وزيادة المعاشات بأنواعها وتخفيض الضرائب وقرارات تانية كتير..
طيب دا بخصوص القرارات الرئاسية اللي فاتت ياترى إيه اللي جاي والرئيس ممكن يقرر ايه تاني.. شوف الرئيس مش بياخد قرار انفعالي لكن بيكون بناء على رصد وتقارير وأرقام لاتحتمل الشك وفي النهاية بيعمل تقدير موقف وياخد قراراه ومتوقع تكون فيه قرارات رئاسية جديدة بخصوص التخفيف عن المواطن وظروفه المعيشية وده بعد مبادرة تخفيض الأسعار لأن الرئيس بيتابع دايما حالة الناس الاقتصادية وبناء عليه بياخد قرارات سريعة للتخفيف عن المواطن ومنتظر يكون فيه حزمة حماية اجتماعية تانية بشكل أو باخر أو توسيع دعم السلع التموينية أو الاعفاءات الضريبية وغيرها من القرارات اللي بتفرق مع الناس في الظروف دي. وكمان متوقع تكون فيه قرارات جديدة لملاحقة تجار الأزمات ودي بان وظهر من كلام السيسي عن الاسعار في احتفالية المرأة المصرية.