لو معاك دولارات ومش عاوز تندم وديها البنك قبل الميعاد ده.. اعرف إيه اللي هيحصل؟

ناس كتير بتسأل يا ترى سعر الدولار الايام الجاية رايح على فين ؟ وهل سعره فى البنوك هيزيد زلا هينخفض؟ وايه موقف السوق السودا لصرف العملات الأجنبية؟ هل ممكن ترجع تانى ولا خلاص القصة انتهت؟ والأهم لو معاك دولارات تتخلص منها دلوقتى ولا تستنى شوية؟.. لو عاوز تعرف اجابة الأسئلة دي كلها لازم تشوف التقرير ده للآخر.

الأيام الجاية فيه تغيير كبير جدا هيحصل فى سوق صرف العملات الجنبية ووفقا لكتير من مؤسسات التمويل الدولية والمراكز البحثية ففيه تطور مفاجيء هيحصل فى سعر صرف الجنيه المصري قدام العملات الجنبية قبل نهاية النص الأول من 2024 والمفاجأة ان كل المؤسسات دي بتتكلم عن تراجع كبير فى سعر الدولار فى البنوك بالتزمان مع استلام مصر حصيلة دولارية ضخمة هتبدأ تدخل البلد بداية من أول مايو ولنهاية يونيو

وعشان كده لو حضرتك معاك دولارات ومش عاوز ترجع تندم عليها بعد شوية لازم تتنازل عنها فى أقرب وقت وتستفيد من السعر المرتفع للعملة الأمريكية فى البنوك قبل نهاية السنة المالية الحالية فى أواخر شهر يونيو الجاي

حد هيسأل ويقول يعنى هو الدولار هينهار فى ظرف شهرين مثلا؟

بص يا سيدي مصر من يوم 6 مارس اللى فات وبعد الاجتماع الاستثنائي للجنة السياسة النقدية فى البنك المركزي وهي بتطبق سعر صرف مرن وسايبة سعر الجنيه يتحدد وفقا لآليات السوق اللى هي بتعتمد على العرض والطلب يعنى كل ما المعروض من العملة الأمريكية يزيد سعر الدولار هيقل وده اللى متوقع يحصل مع وصول تدفقات دولارية ضخمة خلال الكام يوم الجايين هيوصلوا لأكتر من 30 مليار دولار وفقا لوزير المالية محمد معيط وطبعا التدفقات دي هتيجي من كذا مصدره لكن اهمهم على الاطلاق ال20 مليار دولار باقي صفقة تنمية راس الحكمة ضمن الصفقة الكبرى اللى اتفقت عليها مصر مع دولة الامرات وهتحصل بموجبها على 35 مليار دولار استلمت منهم لحد دلوقتى 15 مليار وباقي 20 هيتم استلامهم فى الأسابيع الأولى الشهر الجاي وفقا لتصريحات رئيس الحكومة مصطفى مدبولي

مش بس فلوس راس الحكمة فيه تدفقات دولارية كبيرة هتيجي من صندوق النقد الدولى ضمن اتفاق التمويل الجديد واللى تم رفع قيمته من 3 الى 8 مليار دولار كمان فيه فلوس جاية من البنك الدولى اللى اعلن تقديم حزمة مساعدات كبيرة لمصرومعاه الاتحاد الاوربي اللى هيمنح مصر ما يقرب من 9 مليار دولار

يعنى كده مفيش سوق سودا تانى وسعر الدولار مش هيوصل لـ 70 جنيه من جديد؟

موضوع السوق السودا لصرف العملات الجنبية فى مصر تقدر تقول كده انه انتهى بلا رجعة من بعد قرارات 6 مارس ولو حضرتك متابع اللى بيحصل فى سوق صرف العملات الجنبية هتلاحظ ان سعر الدولار فى البنك حاليا اعلى من سعره فى أى مكان تانى وبالتالى مفيش مبرر اصلا لوجود السوق السودا ده غير انها اصلا سوق مش رسمية والتعامل فيها مجرما قانونا ولو اتمسكت وانت بتتداول النقد الأجنبي هتوقع عليك عقوبات قاسية بتوصل للسجن اكتر من 10 سنين وغرامان بملايين الجنيهات