بتتحكم في 16 تريليون دولار.. إيه هي مؤسسة فوتسي راسل وعلاقتها بمصر.. مفاجآت بالجملة

بتتحكم في 16 تريليون دولار.. إيه هي مؤسسة فوتسي راسل وعلاقتها بمصر.. مفاجآت بالجملة

إيه اللي بينتظر الاقتصاد المصري في الفترة الجاية وياترى إيه هي مجموعة فوتسي راسل وعلاقتها بمصر وإيه حكاية التريليونات من الدولارات اللي بتشغلها في العالم وإيه أخر قرارتها عن مصر.. يالا نشوف إيه الموضوع بالظبط 

فيه مؤسسات مالية ضخمة في العالم محدش واخد باله منها رغم إنها بتكون ليها تأثير كبيرعلى توجيه وحجم الاستثمارات الدولية ومن بين المؤسسات دي بتكون فيه كيانات مالية عملاقة مسئولة عن تشغيل مليارات الدولارات أو بتوصل لتريليونات حولين العالم وبتقدر بتقارير وتوصياتها إنها توجه خط سير الاستثمارات الضخمة للأسواق المختلفة حولين العالم.

طيب ايه هي مجموعة فوتسي راسل وايه علاقتها بمصر .. شوف يافندم عشان تعرف الموضوع إزاي مهم جدا فوتسي راسل دي زي كده منظمة أو وكالة دولية ليها قدرة وتأثير مباشر وشبه مباشر على تحديد وجهة استثمار تقدر بحوالي 15.9 تريليون دولار حضرتك متخيل حجم المبالغ والارقام والفلوس دي بتكون لدى الصناديق المالية والسيادية والخاصة والمستقلة حول العالم واللي بتمشي وراء رأي وتوصيات مجموعة فوتسي وباختصار كده المجموعة دي تقدر تقول هي اللي بتشاور على الاسواق اللي ممكن الفلوس الضخمة دي تستثمر فيها بأمان بناء على تقارير بتطلعها المجموعة والتوصيات يعني مثلا فوتسي راسل دي ممكن تطلع تقرير ايجابي عن مصر ومزايا الاستثمار فيها وبعدها هتلاقي مليارات جت تستثمر عندك يعني هي زي مستشار مالي لكل التريليونات دي حولين العالم.

والمجموعة المالية والفنية والاقتصادية دي متخصصة في دراسة مؤشرات الأسواق خاصة في الأسواق الناشئة والمبتدئة وطبعا مصر أكيد على مؤشرات المجموعة، وطبعا المجموعة بتطلع تقارير ومراجعات مستمرة للأسواق اللي هتوجه ليها الأموال الرهيبة اللي قلنا عليها ومؤخرا أعلنت فوتسي راسل نتائج مراجعتها الأولى لتصنيفات الأسواق في 2024.
واللي يهمنا هنا اللي قالته المؤسسة عن الاقتصاد المصري بعد كل القرارات اللي المركزي والحكومة خدتها واللي كانت السبب في جذب اهتمام المؤسسة الدولية المهمة دي وقال تقريرها إن الحكومة المصرية قدرت تعالج التأخير السابق في قدرة المستثمرين المؤسسيين الأجانب على تحويل رؤوس الأموال من مصر، بعد أن حصلت الدولة على استثمارات ضخمة من صفقات استثمارية  وتوصلها إلى اتفاق على مستوى الموظفين مع صندوق النقد الدولي وقالت كلام كتير ايجابي عن الاقتصاد المصري وإنها هتحط السوق المصري قيد المراجعة لحين انتظار التصنيف الجديد واللي لو طلع ايجابي يبقي مصر اتفتحت لها طاقة مليارات جديدة وهتاخد نصيبها العادل من الاستثمارات العالمية ومش عاوزين ننسى إن مصر كانت اعلى معدلات نمو في الاقتصادات الناشئة في العالم قبل الأزمة الروسية وعندها فرص ضخمة للاستثمار.

وزي ما احنا عارفين طبعا إن تصنيفات وتقارير مؤسسة زي فوتسي راسل وغيرها من وكالات التنصيف الدولية مهم جدا في توجيه الاستثمارات وشفنا التقارير الايجابية عن مصر بعد اللي حصل في الاقتصاد وكتير من الوكالات دي غيرت نظرتها بالفعل من سلبية إلى ايجابية عن مستقبل الاستثمار والاقتصاد..