طبعا كلنا عارفين وقلنا كتير قبل كده إن سوق الدهب في العالم كله سوق حساس وبيتأثر فورا بأي أحداث دولية وخاصة لو فيها صراعات أو كوراث مالية وكمان بيتأثر بالكوراث الطبيعية زي الزلازل ودا لان الدهب بالنسبة للناس والدول والبنوك المركزية عامل زي الملجأ في ساعة الحرب اللي الناس بتجري عليه عشان تكون في أمان وعشان كده سمو الدهب إنه الملاذ الآمن للأموال في وقت الأزمات الدولية.
طيب ايه للي بيحصل في سوق الدهب العالمي النهاردة.. شوف حضرتك احنا قلنا أصلا إن أسعار الدهب مرشحة للصعود بقوة بفعل اتجاه الفدرالي الأمريكي لخفض سعر الفايدة وعشان كمان الأزمات وده الجديد اللي حصل نهاردة بعد التصعيد الكبير حولينا واللي رفع فورا أسعار النفط دوليا وبعديه الدهب.
والتوقعات للأسف كلها بتقول ان اللي حصل نهاردة كفيل إنه يشعل سوق الدهب في العالم وفي الصاغة في مصر كمان، بسبب الطلب الزيادة المتوقع على الملاذ الأصفر نتيجة الخوف الكبير من تطور الأمور وخروجها عن السيطرة وقربها من خطوط التجارة الدولية، وطبعا الأسعار هتضرب في السما لو الأمور فضلت كده.
كمان الصاغة في مصر مستنية حدث تاني مهم هيأثر بشكل كبير وهو انتهاء مبادرة دخول الدهب لمصر بدون جمارك واللي هتنتهي يوم الجمعة الجاية 10 مايو وزي ما احنا عارفين المبادرة دي وفرت على مصر كتير وحلت أزمة كبيرة في وقت ازمة الدولار ودخلت للبلد أكتر من 4 ونص طن دهب، وبما إن الحكومة ما أعلنتش عن تمديد المبادرة يبقي مفيش تمديد وبكده يبقي سوق الصاغة عنده 3 أزمات صعبة هي اللي هتأثر على أسعار الصاغة وهي قرار الفدرالي اللي جاي والأزمة بتاعة النهاردة وانتهاء مبادرة الدهب.
طيب اللي عاوز يستثمر في الدهب يعمل ايه.. مفيش تفكير يطلع فورا على الصاغة ويشتري اللي يقدر عليه لان اللي جاي صعب جدا في سوق الدهب زي مابتقول التوقعات الدولية وبحسابات العقل والمنطق والبيزنس، ولو فيه حد معاه دهب فالأفضل مايفرطش فيه دلوقتي لأن فيه ذروة ارتفاع في الأسعار جاي في الطريق حسب التوقعات وغالبا هتكون في النص التاني من 2024 والربع الأول من 2025 ولازم تصبر لأن فرق الأسعار ساعتها هيكون كبير جدا.
وبنفكركم بردوا بالتوقعات الدولية عن سعر الدهب عشان نحطكم في الصورة.. واللي قالت إن الدهب هيكسر حاجز الـ3 الاف دولار للأونصة ودي هتكون زيادة تاريخية لأن سعره دلوقتي في حدود 2320 دولار وهو فرق كبير جدا وبالجنيه المصري هيكون الفرق ضخم في سعر الجرام وفيه توقعت بتقول إن سعر عيار 21 هيوصل 5700 جنيه حسب الأسعار العالمية.
.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
