دعاوى نفقة في محكمة الأسرة كانت مصير «كوثر» التي حاولت بكل الطرق أن تحصل على حقوقها من زوجها الذي لم يسمح لها أن تحصل على حياة طبيعية، تركها وحدها دون سؤال أو رعاية وكانت هي من تحملت المسؤولية أولادها، مما جعلها تلجأ لمحكمة الأسرة حتى تجد حل لمشاكلها المادية.
قصص محكمة الأسرة.. خلفت 5 عيال عشان الولد
قالت «كوثر» في بداية حديثها: «أنا متجوزة بقالي 15 سنة وخلفت من جوزي 5 أطفال، 4 بنات وولد، هو اللي غصب عليا عشان كان عايز يجيب الولد، انا وهو اتجوزنا جواز صالونات مكنتش اعرفه قبل الجواز كويس بس اهلي سالوا عليه وقالوا كويس وهما اللي وافقوا عليه».
دعاوي محكمة الأسرة..مبيصرفش غير على القدر
أكملت الزوجة حديثها وقالت: «في الأول مكنش فيه مشاكل لكن بعد الخلفة المشاكل كترت على كليون سبب، الأول بسبب إني خلفت بنات ومجبتش الولد اللي هو كان عايزه، وبعد كدة كانت عشان المصاريف مكنش بيصرف علينا خالص ولو صرف يبقى قليل جدا، وده اللي كان مخليني عايزة اخلف تاني، بس هو فضل منكد عليا حياتي لحد ما خلفت الولد وياريت بعدها المشاكل اتحلت».
حكايات محكمة الأسرة..أنا اللي صابرة عليه وسابني
تابعت «كوثر» حديثها قائلة: «بعد الولد المصاريف بقت زيادة اوي وهو مقدرش يكفي كل ده وبقى مش عايز يصرف ولا يسأل في حد، حاولت معاه كتير بس لما اكلمه يقولي ده اللي عندي واعملك ايه ومبقتش عارفة اعمل ايه معاه بس كنت صابرة، لحد ما هو اللي ساب البيت ومشي وحاولت بكل الطرق ارجعه لكن مفيش فايدة».
قضايا محكمة الأسرة.. مبيسألش في ولاده
أنهت «كوثر» حديثها قائلة: «بعد ما سابني اضطريت انزل واشتغل واصرف على العيال عشان هو مبيسألش فينا، المسؤولية زادت عليا ومبقتش قادرة اتحمل جيت المحكمة أرفع عليه قضية نفقة للولاد، وبعد ما رفعتها لما التحري راح يسأله على المحل اللي شغال فيه قالو ده مش محلى وان ظروفه وحشه وهو كداب المحل بتاعه هو، واتحكم لي بفلوس قليلة وبرفع عليه زيادة نفقة عشان خاطر ولاده اللي مبيسألش عليهم حتى الولد اللي كان نفسه فيه».
تابع أحدث الأخبار عبر
