علق الإعلامي أحمد موسى، على الهجوم الذي انتشر على وسائل التواصل الاجتماعي ضد مركز تكوين الفكر العربي، والذي تم تدشينه منذ أيام.
مركز تكوين الفكر العربي
وقال موسى، خلال برنامج "على مسؤوليتي" المذاع على قناة "صدى البلد": "مركز تم الإعلان عنه، وأنا بسأل لا دفاع عن المركز ولا ضد أي شيء، ولكن أنا عايز الناس تفكر، المواطن عقلك والتفكير، بقالي يومين بتابع على مواقع التواصل عمليات تحريض وتخوين شديدة".
وأضاف: "هرجعكم لسنة 1992 كان معرض القاهرة الدولي للكتاب في مناظرة تمت بين الدكتور فرج فودة والشيخ الغزالي ومأمون الهضيبي مرشد جماعة الإخوان الإرهابية، وكان عنوانها الدولة المدنية والدولة الإسلامية وحصل جدل كثير وخلال الندوة بدأت الهتافات ضد الدكتور فرج فودة، وبدأ هنا الحديث حوالين آه دا ازدراء الأديان دا بيحرض".
وتابع: "طلع بعدها على طول بعد كام يوم تقريبًا جريدة النور عملت بيان موقع من ناس وبدأ بعدها على طول اتهام الدكتور فرج فودة على طول بالمرتد واتهامات، حد فكر في كلام الدكتور فرج فودة؟ لأ، حد سمع فرج فودة؟ لأ، حد من اللي قتلوا فرج فودة؟ لأ، يعرفوا فرج فودة ولا قروا كتاب لفرج فودة وكانوا أعضاء في الجماعة الإسلامية استنوا الراجل عند مكتبه وضربوه بالسلاح الآلي".
الجمعيات الأهلية
وأكمل: "اللي قتلوا فرج فودة محمد مرسي العياط أفرج عنهم من السجن وأبو العلا عبد ربه ده اتقتل كان انضم لتنظيم داعش، ومرسي اللي كان أفرج عنهم والواقعة دي حصلت ناس لا سألت ولا قرأت، ربنا ادالك عقل تفكر قبل ما تاخد قرار، وقبل ما تعمل أي حاجة ما نعرف الأول المركز ده هيعمل إيه".
وواصل: "حد سألهم أو قالهم يا جماعة هتعملوا ايه؟، أي مؤسسة في مصر لما تاخد موافقة مش عندك مؤسسات الدولة بالكامل هتشوف وتراجع وهي اللي هتقول، هو في حاجة بتطلع كده يعني؟، هما بيتكلموا أنها مؤسسة وهتاخد إجراءات تبع الجمعيات الأهلية، هو أنت تعمل حاجة تخالف الدستور والقانون؟، طيب هتعمل حاجة تكلم على ثواب الدين في حاجة تتكلم عن القرآن والتشكيك؟".
واختتم: "مش عايزك تجري ورا الكلام؛ لأن اللي جريوا ورا الهضيبي وغيرهم وراحوا قتلوا فرج فوده، رحمه الله".
